Skólabókamafían

Þessi lævísa rottumenning sem viðgengst í íslensku samfélagi. Þessi óþolandi spilling í íslensku skólakerfi. Þessir ósvífnu kennaraskrattar sem halda að þeir séu alltaf að bjarga heiminum. Hvað gerðist í stærðfræðiheiminum á þessu ári sem krefst þess af mér að kaupa tilraunaútgáfu af illa ljósrituðu stærðfræðihefti, ég bara spyr. Ég er kominn með fulla skápa af skólabókum sem eru úreltar, hvað gerðist. Tók ensk málfræði stakkaskiptum við síðustu forsetakosningar eða er búið að breyta tugakerfinu. Ó, nei aldeilis ekki, þessu er öllu stjórnað af skólabókamafíunni. Samansafn illmenna úr hópi útgefanda, höfunda og síðast en ekki síst kennara sem styðja þetta með öllum tiltækum ráðum. Á minni skólagöngu hef ég aðeins hitt einn kennara sem studdi ekki skólabókamafíuna, hún sagði að það stæði hvort eð er það sama í öllum þessum bókum þannig að við mættum velja okkur þá sem auðveldast væri að komast yfir. Og hún hafði rétt fyrir sér, enda skrifaði hún helmingin af þeim, fokk, hún náði mér samt.